Central solar në Kaliforni

Kompania e Kalifornisë eSolar e cila planifikon të ndërtojë disa centrale të vogla diellore ka njoftuar se ka grumbulluar 130 milionë dollarë për projektin. Në mesin e donatorëve është edhe Google.

eSolar ka thënë se do të përdorë paratë e dhuruara për prodhimin edhe montimin e centraleve solare afër qyteteve. Centralet e tyre mund të gjenerojnë 33 megavat rrymë, që është energji e mjaftueshme për furnizimin e 25.000 shtëpive në Kalifornia.

eSolar nuk e ka bërë publik çmimin e projektit të tyre të ardhshëm.

"Centralet më të mëdha solare, të cilat i zhvillojnë kompanitë si Ausre dhe BrightSource Energy, kërkojnë më shumë hapësirë tokë, kushtojnë më shumë dhe marrin më shumë kohë për tu ndërtuar", ka thënë Rob Rogan, zëvendëskryetar i eSolar.

Centrali i parë i kompanisë eSolar do të fillojë punën në fund të këtij viti, në një lokacion tani për tani të panjohur.

Google i ka dhuruar eSolar-it 10 milionë dollarë, në kuadër të projektit të saj Energy Cheaper Than Coal – Energjia më e lirë sesa qymyri.