TorrentSpy duhet të paguajë afro 111 milionë dollarë

Duket se ka marrë fund beteja ligjore dyvjeçare, në të cilën, në njërën anë janë gjendur përfaqësuesit e filmaxhinjve amerikan MPAA (Motion Picture Association of America), e në anën tjetër përfaqësuesit e hapësirës jashtëzakonisht të popullarizuar të internetit TorrentSpy. Fundi i krejt tregimit – dënim me vlerë prej 110.970.000 dollarësh ndaj kësaj të fundit.

Në këtë fitore të rëndësishme ligjore të filmaxhinjve hollivudianë gjykatësi kalifornian i ka caktuar TorrentSpy se duhet të paguajë një dëmshpërblim të konsiderueshëm financiar për shkak të shkeljeve të të drejtave autoriale, në disa mijëra filma dhe seri televizive.

Deri tek shuma prej 110.970.000 dollarësh gjykatësi ka ardhur ashtu që, për secilin film apo seri, të cilat TorrentSpy i ka shpërndarë nëpërmjet hapësirës së internetit, ka përcaktuar dënimin prej 30.000 dollarësh, që matematikisht duket kështu – 3.699 filma dhe seri shumëzuar me 30.000 dollarë bëjnë 110.970.000 dollarë.

TorrentSpy veçmë ka vendosur t’i mbyll dyert e tij, për shkak të problemeve financiare. Këtë vendim e ka marrë qysh më 24 mars.

Ajo çfarë i gëzon përdoruesit në mbarë botën është se TorrentSpy kishte vendosur të mbronte shfrytëzuesit e tij, sepse pati shlyer të gjitha të dhënat para se t’i konfiskoheshin kompjuterët. Përfaqësuesit e TorrentSpy ende nuk janë deklaruar në lidhje me këtë vendim gjyqësor.