Google fsheh të vërtetën

Shkencëtarët thonë që makina më e madhe e kërkimit në internet, në disa fusha të veprimit të saj, për shkak të joobjektivitetit, paraqet rrezik të madh në të cilin duhet të reagohet.
Ekipi hulumtues në krye me profesorin Hermann Maurer, udhëheqës i Institutit për sisteme informatike dhe mediume kompjuterike, në Graz të Austrisë, pohon që Google ngadalë po shndërrohet në “vëllain e madh”, duke krijuar monopole të papranueshme.

"Google në shumë raste shkel intimitetin", thuhet në hulumtimin e shkencëtarëve austriakë, të cilët pohojnë që Google përdorë “vegla” të ndryshme për mbledhje të informatave, por atë nuk e obligojnë kurrfarë ligjesh, siç ekzistojnë në nivele shtetërore, mbi mbrojtjen e të dhënave.

Hulumtimi rekomandon që Google ndikon në ekonomi, sepse gjatë kërkimit, rezultatet e marra nuk përshtaten sipas rëndësisë reale, por nga shpeshtësia që është rezultat i politikës – kush paguan më shumë është më i pranishëm në internet.

Më tutje, ekspertët austriakë thonë që ekziston edhe rrezik i madh i shtrembërimit të së vërtetës, sepse shumica e njerëzve gjatë kërkimit të dhënave mbështeten në Wikipedia dhe Google, e që të dyja shpesh nuk janë burime të sakta të informacionit.

"Qëllimi i hapur i Googlet është që të grumbullojë sa më shumë informata për çdo gjë në botë. Është e papranueshme që aq shumë pushtet të jetë në duart e një kompanie private: ajo mund të sabotojë, kontrollojë dhe dominojë botën me lirinë e saj të veprimit", tërhiqet vëmendja në përfundimet e hulumtimit.